المسلسل التركي : نـــور !

محمد عبدالباقي
والله كتر خيرك
طبعا الناس تشبكك نور وقروب ضد المسلسل وحاجات كده تخليك تفكر انو المسلسل دا اسرائيل عملتو عشان تدمر مقدرات الامة
اتاري مسلسل رايق وبحكي قصص اسر
عارف يمكن الناس في نور وجيهة
وكعادة النظرة الطبقية بيحاولو يخلو الناس تكرهو وتكره شخصياتو ويقولو عليهم شينين .. طبعا البعرفو انو الممثلين اتراك يعني الحمام حيكونو قطع عديل كده
ايواااااا
انا حسي فهمت

القصة يا دكتور مافي نور
مهند بطل المسلسل
عشان كده معظم متابيعنوا من النساء بمختلف أعمارهن

و مهند مالو يا ود الجاك ؟

يا محمود , اسف لتأخر الرد عليك ..
طبعاً كلامك مختلف عن الحاجه البروجو ليها الناس ( خصوصاً الرجال )
لكن انا حبيت اسمع رايك و انتظر راي زول مخالف ..
بالجد لحدي الان ما شفت فيهو حلقه , لكن حسب السمعتو انو الجكس مكسرات في مهند , و في رومانسيته
فااااااا حقو نقوم نفتشو , و نحضرو و نتعلم حبة رومانسيه !
ولا كيف ؟

قالوا وجيه شديد
أوجه من شباب السودان
أنا ماعارف لكن إختلاف أزواق

غايتو انا ما تاعبته ولا حتابعه
لانه دايرليه زول راااااايق
شنو مسلسل اكتر من 200 حلقه
انا من المسلسلات الطويله دي ما تبعت غير روبي و بعد كدا حرمت اتابع مسلسلات مدبلجه لانها نهايته طلعت بااااايخه

هو زي ما قال محمود بس الناس بتفتش عن العيوب...لكن هو مسلسل جميل بس انقطعت منو الايام الفاتت دي ورجعت لقيتو مشا كتير وبفيت زي الطرش في الزفه
ياجاكو والله اغلب المتابعنو جكس ود عشان مهند والاولاد متابعين سنوات الضياع - ده سامع بيهو ساي - عشان لميس
ياعبودي اذا بتتذكر كساندرا وكلارا و نانو ديل اجمل مسلسلات مدبلجه(مكسيكيه طبعا) بس اي واحد 150 حلقه تقريبا

يا محمد سيد يا حليل البال الرايق البتابع بيهو مسلسل 200حلقة
هسه تحضر حلقة إتنين يطلع ليك في وقته 500حاجة المفروض تعملها تلقى روحك طوالي بره الشبكة

ناس الجزيرة إستضافو مسئول إعلامى عربي والمسئولة عن الدبلجة
المسئولة بتقول إنه بس عايزين ثقافة جديدة وإنه المشاهد العربى مغشوش عليه من الاعلام العربى بأشياء تقليدية
تقول إنه إنها كشفت فراغ المشاهد العربى وعدم توفر المادة الجيدة له
المسئول بقول أنه المسلسل بغزو المجتمع بثقافات منافية للاسلام كخيانة الصديق فى خطيبته, وعدم حرمة حمل الاخت من الاجنبى والخمر وغيره أكثر
بقول إنه المسلسل جاء فى توقيت خطير فى وقت الامة مفروض تصحى فيه
بقول إنه مؤثر أكتر من الاجنبى بحكم الدبلجة خصوصا مع الاعداد الكبيرة التى تشاهده
بقول إنه واضح أنه المرأة العربية أصبحت ترمو إلى نوع جديد من الرومانسية مفقود من الرجل العربى
يقال أن هناك خمسين عمل تركى مماثل قادم

صراحه انا حضرت كم حلقه من مسلسل نور قلت اشوف الضجه الحولو دي...هو مسلسل فارغ ما عندو اي هدف غير انو ينشر رومانسيه حالمه وكاذبه في مجتمعنا العربي والاسلامي..وتبسيط مفاهيم خاطئه كالخيانه والزنا وغيرها..وانا في رايي انو لقى تربه خصبه في المجتمعات العربيه لكونها تفتقد للرومانسيه وتبحث عنها بشغف ... الاغرب اني قريت في كم موقع في الانترنت عن المسلسل..ولقيت انو المسلسل لا يحظى باي شعبيه في تركيا نظرا للماضي القبيح لبطل المسلسل مهند"مافي داعي نوريكم"..وبالمناسبه هو اسمو محمد في النسخه التركيه من المسلسل..بس في الدبلجه حول الى مهند خوفا من ردة فعل اهل الدين...واليكم بعض الطرائف حوله..حيث سجل في اسبوع واحد في السعوديه اسامي المواليد اكثر من 400 اسم متنوعه ما بين نور ..مهند..يحيى..لميس..واحده رفضت الزواج من خطيبها حتى يغير اسمو الى مهند..بالمناسبه اسم خطيبها محمد...انتعشت السياحه الى تركيا وارتفعت الى اعلى مستوى اليها هذا العام...وده غير حالات الطلاق وضرب الزوجات الحالمات بالرومانسيه من قبل ازواجهم او من غيرتهم ... والكثير الكثير ...الله يصلح حال امتنا..ودمتم...

بالله اقروا الخبر ده ....

باعت سعودية مالكة مزرعة في نجران قطيع ماشيتها عن آخره، حتى لا يتشتت انتباهها عن متابعة المسلسل التركي "نور" الذي يجد قبولا واسع النطاق في العالم العربي ولا سيما في المملكة العربية السعودية، وتبثه قناة mbc4.

وقالت المرأة السعودية، وفقا لتقرير صحيفة "سعودي غازيت" الإنكليزية، إنها لم تجد الفرصة مواتية لمتابعة المسلسل بتركيز كامل، لأنها اضطرت بين الحين والحين لإطعام خرافها والعناية بها، ولذا قررت التخلص من القطيع بأكمله!!!!


............ لا تعليق

يا اخونا روقو المنقا شوية
شنو الزعل والعصبية والتشنج دا
كأنو مسلسل نور هو الحاجة الوحيدة الفارغة في مجتمعاتنا والحاجة اللي لازم نهاجما ونحاربا لأنها تنشر الرذيلة والمنكر والزنا والكلام الكتير القالو الريح
ايه هدم المجتمعات ومجتمعنا العربي الاسلامي.... عليك الله يا الريح مجتمعنا دا كان كويس قبال نور... وكنا على اعتاب القدس بس جا نور واشغلنا؟
طيب انت بتشوف نور؟ ولا محمد علي؟ ولا كبلو؟ ولا فضل المرجي؟ ولا ابوبكر احمد ابراهيم ولا عبير؟ ولا ؟
منو القاعد يشوفو؟ مش نفس الناس البيشوفو باقي المسلسلات والناس العندها وقت تشوف ودي ماحيفرق معاها المسلسل يكون شنو. طيب تتذكر مسلسلات مكسيكية كتير كانت برضو حوالين المواضيع دي وما اتحاربت كده؟
طيب مسلسل نور ولا اتنين تلاته فيديو كلب من بتاعين ميلودي ولا دريم بتاعت الرقص الشرقي ولا ام تي في ممكن يهدم المجتمع اكتر؟
يا اخوانا الاعلام دا موجة بيسوق الناس.. ممكن يوديكم شرق وممكن يوديكم غرب.. يوريكم الصح باطل والباطل صح... نعمل شنو؟
نرفع البنطلون شوية عشان ما نتوشخ ونقيف في طرف القيف نتفرج على الموية...بعدين نحكم
عندي برية طويلة لكن لي بعدين
واحذرو نور احد اسباب تدني نسبة الصودا في الببسي
وكل سنة وانتي طيبين

أحـــي أنا من برقو
هسا عبير دي مالا بس عملت شنو؟

يا سيدي انا عن نفسي ما شايفة انو المسلسل مختلف عن باقي المواد المعروضة .. أنا نفسي بشوف حلقة حلقتين من فترة للثانية (شمار مني كالعادة) .. لكن المثير للعجب الاهتمام الزايد عن الحد بالمسلسل في المجتمع العربي والحوادث الغريبة البتحصل نتيجة للهوس الغريب بيهو..
خد عندك حادثة السيدة السعودية السابق ذكرها..

لكن بيني وبينك مرات بلقى للناس عذر.. بالذات المجتمع النسوي.. المسلسل بيقدم للمشاهدين أحلامهم الرومانسية المفقودة أو المقتولة كبتا وكمدا.. أظن ده سبب مهم بالإضافة إلى "مهند"!!

كدي يا جماعة خلونا من الموضوع ده ياخي بقى يلاقينا في أي حتة والله تعبنا منو عديـــــل ..

ايوا دا الكلام
الداير يشوف نور اليشوف نور
والداير يشوف المجد خلوه اليشوف المجد
المجتمع ما بقى زي زمان ممكن اي زول يسوقو ويتفسح بيه
اغلب الناس بتعرف الصح من الغلط
وكتير في مبالغات وحكايا بتكون ما صحيحة بس يحاولو يكرهونا في الحاجة
كرهتونا زاتو
سلام لكل الشباب
عبير؟ انا جبت سيرتك؟
تحياتي

برقو كتب:
طيب انت بتشوف نور؟ ولا محمد علي؟ ولا كبلو؟ ولا فضل المرجي؟ ولا ابوبكر احمد ابراهيم ولا عبير؟ ولا ؟
منو القاعد يشوفو؟

مش دي سيرتي برضو ؟؟؟

طيب اسف
كنت قايلك ما بتشوفيه
معليش
يا اخونااااااااااااااااا
عبير بتشوف نووووووووووووووووووور
خلاص ارتحتي يا عبير
معليش دخلتك مع العجايز الختيتهم فوق
السموحة

برقو ازيك وليك وحشة والله
الظاهر انا الوحيد الماتابعت لا مسلسل نور لا سنوات الضياع

نصر الدين الزبير دفع الله كتب:برقو ازيك وليك وحشة والله
الظاهر انا الوحيد الماتابعت لا مسلسل نور لا سنوات الضياع

ما الوحيد يا نصر الدين ...
انا ذاتي ما شفت ليهم اي شي , بس سامع الناس تنقنق !

انتو ما الوحيدين الماتابعتو انا برضو ما تابعتهم ولا بحب سيرتهم مع انهم كسرو الدنيا شكلهم

انتو ما الوحيدين الماتابعتو انا برضو ما تابعتهم ولا بحب سيرتهم مع انهم كسرو الدنيا شكلهم

mermaid كتب:انتو ما الوحيدين الماتابعتو انا برضو ما تابعتهم ولا بحب سيرتهم مع انهم كسرو الدنيا شكلهم

بختنا يامحمد على
مابرانا اللى ماتابعنا مسلسلى نور وسنوات الضياع
معانا ناس ومن الجنس الاخركمان ماحضروهم.

أخيرا الواحد لقى ناس زيو ما تابعو المسلسلات دي
كنت عشمان ألقى واحد
لقيت تلاااااتة

يا مانت كريم يارب

يا جماعه ... انا رابعكم... حقو نعمل لينا تجمع خاص لغير متابعي نور... مع انو عارف حنكون اقليه.... للعلم فقط ذكرت شبكة MBC انو متابعي المسلسل كان 4 مليون مشاهد عربي.. وفي اربعة مسلسلات اخرى تركيه هي الان تحت عملية الدبلجه ... الله يكيفينا شر ناس نور ومهند ولميس ويحيى ....