تاني عشان ما تنوم وقت الشغل

يــــــــــاااا لــــهـــــــــــــوي..

الشغل زاتو خلينا.. نقوم كمان ندقس نلقى روحنا دخلنا الجهاز الهضمي لأول أصلة جات مارة

اتخيلي زمان جدودنا بيحكو لينا انهم لمن يكونوا مسافرين والليل ينزل ببيتوا في الخلاء لأنو زمنهم كان السفر على الدواب
كان قلقهم كلو من انو تجي أصلة تبلعهم وهم نايمين
فكانوا بيسوو حركة ذكية جدا - لكن صراحة مرعبة وبينتج عنها تجربة فظيعة
لكن للأسف ما كانت في حلول تانية

الواحد منهم بينوم وبيباعد بن رجليه عشان يستعصي بلعه على الأصلة
هي في الحالة دي بتبدأ تبلع واحدة من رجليه وهو لا يحرك ساكنا ومتظاهر بالنوم
لمن تصل مستوى الفخذ بيقوم بحركة سريعة جدا بيسل سكينو من ضراعو وبيقطع رأسها وبيواص نومو بنفس الطريقة

الحمدلله الزمن داك ما اتولدنا
أسي الوحد كان بقى حمض أميني في عضلات أصلة

قلت شنو؟
تبدا تبلع مش كده؟؟
والله لو انا اقعد في حتتي طول عمري
الموت حق لكن الموت بواسطة بلع وأصلة ده صعب والله

كبلو والله انا هسه قاعد وبكتب في الجهاز وخايف تجيني اصله من تحت ولا حاجه ,,,, ولا دي زاتها تجي ناطه من الصوره وتبلعني.... اهلنا الزمان ديل كان عندهم قوة قلب عجيبه ... يستناها لحدي ما تبلع وحده من رجلينو وبعدين يقتلها!!!!!!!!ا... غايتو انا لو حصلي الكلام ده كان بلعت ريقي وبلعت انفاسي وبلعت اخر لحظات لي ولو في طريقه ابلع روحي كمان .... ولا اخليها تبلع وحده من رجليه ....

كبلو كتب:
هي في الحالة دي بتبدأ تبلع واحدة من رجليه وهو لا يحرك ساكنا ومتظاهر بالنوم
لمن تصل مستوى الفخذ بيقوم بحركة سريعة جدا بيسل سكينو من ضراعو وبيقطع رأسها وبيواص نومو بنفس الطريقة

و لو بدت تبلع من الراس يعمل شنو ؟

طبعا مات أكيد

والله دي مافكرت فيها
شكلو كانوا بيخلوها برضو تبلعو لحدي ما تقرب للنخرة بعداك يقتلها