منتديات طب الإسلامية

مرحبا بك في منتديات طب الإسلاميه ...

    شمار وشمشار مع الريح

    الريح احمد ابراهيم
    الريح احمد ابراهيم
    عضو فــعَّال
    عضو فــعَّال

    الدفعة : العاشره
    عدد المشاركات : 119
    تاريخ التسجيل : 04/08/2008
    نقاط التمييز : 4223
    التقييم : 0

    شمار وشمشار مع الريح Empty شمار وشمشار مع الريح

    مُساهمة من طرف الريح احمد ابراهيم في الأربعاء 17 سبتمبر 2008, 00:47

    شمار وشمشار مع الريح 31930263ah0

    تابع الحلقه السابقه على قناة المنتدى العام...



    كو كو ...كو كو كو

    شمشار:اها يا محمد علي 2..الناس ديل الغتاتا دي جابوها من وين.. اليشوفهم في المنتدى يقول مافي احسن منهم

    شمار:ياراجل الوقت زاتو ما وقت زياره...كلهم حيكونو نايمين

    -وزنبي انا شنو اموت بالسخانه دي ...شويه كده واتبخر مع الحر ده...اتبخر شنو .. اسيح عدييييييل

    -والله اليسمعك يقول انت شهاده عربيه من جبال الالب...ماجاي من ادغال الفتيحاب دي ..عليك الله اسكت ساي

    -علي الطلاق ما امشي الا يفتح الغتيت اب اربع عيون ده

    كو كو كو كو

    تااااااااااااااااااااااني ...الله يرضى عليك يا الريح افتح... الله يعدي اليوم ده على خير ويقطعني الخور ده تاني وانا على زمة الراجل ده

    ومن خلف الباب المطروق...البيت بااااااارد من شدة الكندشه ..علب ايسكريم مرمية في كافة ارجاء البيت.. وباقي فشار في الواطه... وباقي حاجات بعرفها براهو...كنبه ناصيه مطله على تلفزيون مشخشخ...ينام عليها الريح بكل اريحيه مع حبة شخير يعكر صفو المكان.. النضاره وين وين؟ هدي لابسها في عويناتو.

    كو كو كو كو كو كو

    الريح:يالله من الازعاج ده...الواحد ما برتاح في البلد دي يعني ولا شنو؟

    كو كو كو كو كو كو

    =دين وما عندي ..ومافي واحد طالبني حاجه...وما قاتل لي زول.. الدق ده من دق نصاح .. كدي النمشي نفتح

    كوكو كو كو كو

    = طيب طيب جيت

    وفتح الباب ووجد........ راجل بجلابيه قصيره ومركوب مصنوع من واحد من البرمائيات او الزواحف قدر ما حاول يعرفو ما قدر من شدة الغبار العليهو.. لافي عمتو زي ايسكريم الشعله(التشبيه ده اول شي جا على بال الريح طبعا) يتصبب عرقا ويتتطاير الشرر من عينيه...والدخان من ادنيه..وجنبو مره زغللت عيونو...ما شدة جمالها ولكن من الوان الطيف اللابساها... توب اخضر...شبشب احمر.. شنطه كحليه...المهم خلونا نرجع للقصه

    شمشار:لا عليك الله..فاتح ليه...ما بدري...ولا اقوليك نحن ما مستعجلين خد ليك نومه كده وتعالينا بعد ساعتين كده...الجو بره جميل.. ما شايفنا منديين كيف من سماحتو..

    الريح:انت منو ياخ؟ وماداير افتح ليك في مانع؟

    بفهمك جوه بس ندخل.. المره دي عرقت لمن جاها جفاف..لو بزغت ساي حيركبو ليها دربات...

    وداخل البيت... وبعد ان ضربو الكندشه وارتاحو من تللك السخانه...بدأ الحوار

    الريح:اها انتو منو ؟ومالكم جايين وقت زي ده؟

    شمشار:والله انا ومرتي دي متابعنكم من بدا المنتدى ...ما فوتنا حلقه.. وبنحبكم شديد..كم مره مرتي حرقت الحله من كتر ماهي معاكم ونست المطبخ زاتو.. كم مره سرقت لي كم بيت شعر من اشعاركم وقلتو لمرتي دي..وكم نكته كده عشان افرفش عليها.....بس الحال في الاونه الاخيره دي ما عجبنا... كسل في المشاركات...ناس بقت تختفي من غير سبب..ناس معينه بتشارك وناس بتعاين...قلنا النجيكم ونسأل احتمال في حاجه كده ولا كده... ولو بيدنا نساعد والله ما بنقصر...

    =هسه داير تقنعني انكم قاطعين المسافه دي عشان سبب زي ده

    -اي والله...راجلي ده ما بكضبو لدرجة انو قرب يطلقني كم مره بسببكم.. الله ستر بس

    -ولو ما مصدق علي الــــطلا...

    وهنا نطت شمار وكتمت انفاس راجلها بيدينا الاتنين ولو كان في طريقه بكرعينا كمان


    -شوف الراجل ده,,, يازول انت ما نصيح..خاتي طلقاتك دي في طرف لسانك...الله يلعن اليوم الجابني فيهو معاك خور السجم ده

    =هاهاهاهاهاهاها ..والله انتو ظراف شديد...خلاص صدقتك ياراجل

    والتقط شمشار انفاسه التي كادت ان تخرج

    -يامره جنيتي انت.. دايره تقتليني بعد العشره دي ...اشهد ان لا اله الا الله وان محمدا رسول الله..اخير والله انطق الشهاده من هسه... ما معروف تاني احتمال تخنقيني وانا نايم ... لا ألم في دنيا معاكي ..ولا اخره كمان...

    وحل السكون بالجلس للحظات... قطعتها حاسة الشمشره التي بدأت بالعمل لديهما


    -الا يا الريح ده شنو البيت المنكش ده ...والايسكريم المجدع في اي حته ده...انت فطموك بيهو ولا شنو؟

    =اها جيتني انت كمان ...ما صدقنا ارتحنا من محمد وابراهيم وكبلو ...ياخي انا ما اول زول ياكلو ...ممكن اسألك سؤال؟

    -اتفضل قول

    =اكلتك البتحبها من ايد مرتك شنو؟

    وهنا اخضرت واحمرت وازرقت شمار من الخجل زي الوانها الابساها

    -بحب اكل دكين

    =شنو؟

    -دكين....ملوحه ما بتعرفها كمان...صحي شهاده عربيه

    =المهم ما علينا.. الشي البتحب تطفحو من ايد مرتك ده ..انا زاتي بحب اطفح الايسكريم ..ارتحت هسه

    -وانا مالي خلي الجماعه ديل يدوروك بيهو طوالي...ثم تانيا انت فاقد ليك حنان...ولا ماخد ليك شواكيش...شنو شابكنا المنتدى كلو مواضيع...انا ببكي ليه ... وعندما اكون وحيدا... عصر المرأة قد بدأ...ياكا الداير العرس يازول

    =لأ ما كده بس ساكت بتجي على خاطري... ده غير اني بحب اتفاعل مع قضايا الطرف الاخر

    -طرف اخر شنو عليك الله ...اخير ليك امسك طرف توبي الجاكار ده... وانا اعرس ليك ست البنات

    =يامره انا هسه قلتليك داير عرس...النصيب ماجا وما لقيت الوحده الدايرها

    -يا زول العمر ماشي والجنا سمح تشوفو قريب من عمرك

    -يا مره الزول قاليك ما داير... دايره تعرسي ليهو غصب... والله ده الفضل .. مرتي بقت خطابه كمان

    -يا راجل انت اطلع منها... شوف الصور دي شايلاها معاي طوالي لبنات جاراتي في الحله... سمحات شديد وما بتلقى احسن منهم

    وبدأ الريح في فرز الصور ...شمار ساي... شكلهم عادو صاحبنا..

    =الالوان دي تاني.. اخضر واحمر وكحلي ... شنو الهدوم اللابسنها دي مافي اي تناسق فيها..

    -مالها الالوان دي دي اخر صيحه

    =والله الا تكون اخر صيحة ديك

    -خلينا في المهم...دي بت حاجه فاطنه...والتانيه دي بت حاجه خجيجه..والعسل دي بت اخلاس...اما اب شعر طويل دي فـــ...

    وهنا تدخل شمشار في محاولة لانقاد الموقف..

    -يا مره انطقي الاسامي دي صاح... والله بنطق ده يفكرهم حبوباتو وبناتهم عماتو

    =تشكري على اهتمامك بي ... ولمن اكون داير اعرس بجيك ... ارتحتي.... خلونا في المهم ... هسي دايرين مننا شنو؟

    اسمع يا الريح... والله بعد وصلنا بلدكم البعيده دي دايرين نظهر معاكم

    =كيف يعني؟

    -ما عارف دايرين نكون معاكم في الشبكه العنكبوتيه دي ... انشالله انا الرجل العنكبوت... و المره دي....... الرجل الاخضر

    -اخضر في عينك يا راجل يا مخرف

    =بس كده جدا ما عندكم مشكله

    -بس بشروط

    =اها ورينا شروطك

    -انو اي واحد داير اكتب مشاركه يدخلنا في بداية الحديث في مقطع بسيط او في نهايتو... عشان الناس تعرفنا

    -او يحكي قصتو او مواقفو المرا بيها معانا في مدينة شرم الخور دي ويسردها في شكل قصه...

    =كلامكم ده يعني اي زول في المنتدى واي مشاركه

    -ما كده اكيد.. البقدر يدخلنا معاهو حبابو ... والما داير مابنجبرو... بس الفيهو اتعرفت

    -ياراجل ما تكون حامي كده... قصدو..ما شرط طوالي... وما شرط اي مشاركه... ممكن منتدى الشمارات.. او العام .. او اي مساهمه حاسي اتو ممكن نضيف عليها نحن جاهزين

    -بس نحن ما حنكون قاعدين طوالي ..لحدي نهاية الشهر ده وراجعين.. انت عارف العيد قرب ولازم نرجع للشمري القاعد مع عمتو التايه

    =الشمري منو؟

    -يووووووووووووووووووووه...دي قصه طويله... المهم حبينا نجدد ليكم المنتدى بتاعكم..ونكسر الروتين ونزيد ليكم مشاركاتكم

    =والله حبابكم عشرة... وعشان اوريكم ترحابي بيكم حاشاركم معاي في اول موضوع تكونو فيهو... قصرت معاكم


    وشقت زغروده طوييييييييييييييييييييييييييييييييييييييله ارجاء مدينة شرم الخور


    *مشهد في بيت محمد علي وصوت الزغروده يقلق مضاجعه

    ايووووووووووووي يوووووووووووي

    محمد:يالله من اليوم ده... الناس دي جنت... ما بتتخمد تنوم ..والله كان ابرك لي امشي الحتانه... اخير ازعاج اولاد اخت مرتي ولا ازعاج الحله الكئيبه دي..


    *نرجع تاني

    -يامره انت جنيتي الناس تقول علينا شنو؟ ما صايمه

    -دي الفرحه ياراجل ...بعد ده حاظهر على العالم.. حقو امشي الكوافير واغير من مظهري ...واظهر بنيو لوك جديد

    -ما عاد انا معرس نانسي عجرم ولا اليسا... والله حقو انا الاغيرك بوحده تانيه

    -هو في وحده بترضى بيك انت يا اب جلابيه بيضه مكويه,,,,وعمتك العامله زي ...


    *وداخل عقل الريح....ترددت كلماتها الاخيره واكملت الجمله...(زي ايسكريم الشعله(

    نرجع تاني..

    -وعمتك العامله زي الدبيب الملفوف جوه الخيش

    = ياجماعه استهدو بالله... سيبو الكلام الكتير...خلونا في المهم ...موضوعي المره دي حيكون عن فوائد الصوم..زي ما عارفين نحن في شهر الصيام

    -اها ابدا

    =بس ما هنا حيكون فى المنتدى الاسلامي

    -خلاص النقوم نتوضا عشان نكون جاهزين

    -ياراجل قال منتدى .. ما مصلى ولا جامع

    = هسه الفطور قرب.. افطرو معاي وبعدين نتكلم... المشكله بس اني عزابي ... وما بعرف اطبخ..فاعزروني

    -ومنو القال ليك حنخليك تفطرنا انت... والله كان رجيناك.. ياهو الفطرنا بايسكريمك ده ولغاويزك دي... قومي يا مره اعملي لينا ملوحه

    =دي شنو يا جماعه؟ انا ما باكل شي ما بعرفو

    -حتعجبك ما تخاف.. وحتتزكرها طول عمرك...الأكله الوحيده في العالم البتشتغل فيها حاسة الشم اكتر من حاسة التزوق


    ومشت شمار للمطبخ ... وصاحبنا الريح بقى لاحول له ولا قوه...في انتظار المجهول...الله يستر بس


    تابعو الحلقه القادمه على قناة المنتدى الاسلامي

    شمار وشمشار مع الريح 31930263ah0
    محمد علي أحمد
    محمد علي أحمد
    المشرف العام
    المشرف العام

    الدفعة : العاشرة
    عدد المشاركات : 1299
    تاريخ التسجيل : 18/07/2008
    نقاط التمييز : 4465
    التقييم : 3
    دولة الإقامة : السودان

    شمار وشمشار مع الريح Empty رد: شمار وشمشار مع الريح

    مُساهمة من طرف محمد علي أحمد في الأربعاء 17 سبتمبر 2008, 01:16

    loool


    الريح ...
    ياخي الله يديك العافيه , و يضحكك زي ما ضحكتنا ياخ !
    دا شنو العوير دا !
    دا ابداع حد العواره والله !


    _________________
    شمار وشمشار مع الريح 810550573
    Abeer B. Al-imam
    Abeer B. Al-imam
    مشرف سابق
    مشرف سابق

    الدفعة : الثالثة عشر
    عدد المشاركات : 344
    تاريخ التسجيل : 20/07/2008
    نقاط التمييز : 4238
    التقييم : 0

    شمار وشمشار مع الريح Empty رد: شمار وشمشار مع الريح

    مُساهمة من طرف Abeer B. Al-imam في الأربعاء 17 سبتمبر 2008, 13:09

    ناس البيت حيشكوا في قواي العقلية من الضحكبالجد مبالغة
    ...(زي ايسكريم الشعله(

    Laughing Laughing Laughing
    كبلو
    كبلو
    مراقب عام
    مراقب عام

    الدفعة : العاشرة
    عدد المشاركات : 880
    تاريخ التسجيل : 18/07/2008
    نقاط التمييز : 4592
    التقييم : 8

    شمار وشمشار مع الريح Empty رد: شمار وشمشار مع الريح

    مُساهمة من طرف كبلو في الأربعاء 17 سبتمبر 2008, 13:15

    والله يا ريكا ما عارف أقوليك شنو
    لكن بعد أنتهي من الضحك حأجي أقوليك
    loool loool loool
    lol!
    loool loool


    _________________
    شمار وشمشار مع الريح 15781610
    الريح احمد ابراهيم
    الريح احمد ابراهيم
    عضو فــعَّال
    عضو فــعَّال

    الدفعة : العاشره
    عدد المشاركات : 119
    تاريخ التسجيل : 04/08/2008
    نقاط التمييز : 4223
    التقييم : 0

    شمار وشمشار مع الريح Empty رد: شمار وشمشار مع الريح

    مُساهمة من طرف الريح احمد ابراهيم في الأربعاء 17 سبتمبر 2008, 14:56

    هلا بيكم يا جماعه... ومشتاقين... الحمدلله انها عجبتكم... وفرفشتك عليكم مع الصيام ده....عبير حاسبي من الضحك يقوم يجيك وجع مصارين جد جد..الناس دي جاينك... حاسبي منهم ... كبلو اخوي.. طبعا انا لسه متخيل نفسي كيف حاضحك لمن الناس دي تجيك في بيتك وانت المعروف باسلوبك الساخر...فشد حيلك واحكي لينا قصتك معاهم
    محمد الجاك
    محمد الجاك
    مشرف
    مشرف

    الدفعة : السادسة عشر
    عدد المشاركات : 514
    تاريخ التسجيل : 19/07/2008
    نقاط التمييز : 4302
    التقييم : 0

    شمار وشمشار مع الريح Empty رد: شمار وشمشار مع الريح

    مُساهمة من طرف محمد الجاك في الجمعة 19 سبتمبر 2008, 20:30

    loool loool loool loool loool loool loool
    والله يا بوس بالغت عديل كده
    scratchكويس إنو الواحد ما سامعو زول عشان يقوليهو جنيت


    _________________
    شمار وشمشار مع الريح 16051510
    ابراهيم فضل المرجي
    ابراهيم فضل المرجي
    مشرف سابق
    مشرف سابق

    الدفعة : العاشرة
    عدد المشاركات : 376
    تاريخ التسجيل : 20/07/2008
    نقاط التمييز : 4241
    التقييم : 0

    شمار وشمشار مع الريح Empty رد: شمار وشمشار مع الريح

    مُساهمة من طرف ابراهيم فضل المرجي في الأربعاء 24 سبتمبر 2008, 07:36

    والله يا الريح طلعت احسن من الجماعة بتكرم ضيفك
    انت زول كويس جدا وزول وطني ما متعصب
    إحم إحم
    ما تجيني مارق يا العارف روحك
    ما فاضي ليك
    عموما انا اجتزت مرحلة الضحك وبقيت في ابداع المحتوى والقالب والترتيب والسلاسة
    عايزة محلل
    بس جاملت نفسك شديد اااه
    وحتجي تضربنا نحنا
    المضيف الاول ما ظلمته
    ياها عادته

      الوقت/التاريخ الآن هو الأربعاء 26 فبراير 2020, 18:21