الموضوع رقم 100( لغة الشوارع )

السلام عليكم ورحمة الله تعالى وبركاته

اولا احب اهني نفسي على بلوغي المساهمة رقم مية
واهدي هذة الفرحة لكل اعضاء المنتدى

وحبيت انو تكون مساهمتي المية موضوع مهم جدا بالنسبة لي.. ومثير للجدل في نفس الوقت ..
والمضوع هو ..
لغة الشوارع كما يحلو لناس الجيل القديم او كبار السن تسميته
حقيقة انا ما بحب تسميتها بهذا الاسم ..
ممكن نسميها لغة شباب الزمن دا
او لغة الجيل الجديد

يعني في الجامعة .. المدرسة .. الشارع .. او حتي مع اخوانكم في البيت تلقاهم يستخدمو مصطلحات او بالاحري كلمات خاصة بهم لا يفهمها الا شاب مثلة او من كث القاعدة من ناس الجيل الجديد بحكم احتكاكة الكثييير بالشباب
وبما انكم اطباء او ح تكونوا اطباء في المستقبل .. وانكم حتحتكوا بجميع طبقات المجتمع
بقترح بضرورة معرفة اللغة دي
ومهما كان ديل شبابنا ..ودا جيلنا .. ودي لغتنا

وعلى قول ماما
اتعلم الصنعة واتركها
وعلى قولي
اتعلم اللغة واستخدمها وقت الحاجة

ح انزل ليكم كم مصطلح كدا
والبقية .. انا عاااارفاكم يا شكاك ومحمد مالاخصائي الكبيييير يس ما بتقصروا

- مية مية
- الف
دا للتعبير عن الرضا .. او انو الحاجة دي كويسة

- ما تركبونا ماسورة
ما تشرونا
- كترتي المحلبية
مصطلح خاص بالبنات ويعني باااااااالغتي
-وحوش ناكل الظلط
للتعبير عن الفخر ..

وللبقية عودة ان شاء الله
وفي انتظار مساهماتكم ..

اسه ميه ميه دي فيها شنو ؟
ما عربي عديييل !!!!

مبروك المية مساهمه يا رحاب , و ميه ميه والله !
بجيك راجع بي روقه ..

دكتور محمد علي
شكرا علي مرورك .. ونحن في انتظار ورقتك

نصر الدين الظريف ..
والله كلامك صح مية المية

رحاب اسمح لي اتعدى ع حقوقك الفكرية و اهنيك بنفس التهنئة ال هنيتي بيها كل الاعضاء

الف مليون مبرووووووووووووووك
وعقبال مشاركتك الاف ان شاء الله
ودوما للامام
وربنا يخليك للمنتدى

بالنسبة للموضوع فهو كعادتك خفيف و لطيف

انا بعترض على تسميتها لغة شواع و لكل عصر ظروفه و ادواته و كل الكلمات المستخدمة دي ناتجة من مواقف حصلت و مثلا كترتي المحلبية مثلا مرتبطة بنكتة الفكي (الدجال)الشهيرة الوعدالفتاة بانها حتحلم بالشخص الحتتزوجه لو استخدمت نوع معين من الحنة و لما جاته بالصباح و اخبرته انه الشخص الحلمت بيه صرخ في وجهها وقال كترتي المحلبية

بيخت النكتة صح؟؟؟؟؟؟؟؟؟؟

ولنا عودة

شكاك شكرا ليك على التهنئة ومرورك اللي بيعطي المواضيع رونق وجمال
وانا اتفق معاك في التسمية

بنكتة الفكي (الدجال)الشهيرة الوعدالفتاة بانها حتحلم بالشخص الحتتزوجه لو استخدمت نوع معين من الحنة و لما جاته بالصباح و اخبرته انه الشخص الحلمت بيه صرخ في وجهها وقال كترتي المحلبية

بيخت النكتة صح؟؟؟؟؟؟؟؟؟؟

دا اول مرا اسمع النكتة دي
ما بيختها ولا حاجة .. لكن برضو ما بتلحق محمد موسى

ولحين عودة الخبازين ..
نواصل

- بنكسر ليهو تلج
بنكشكر ليهو
- صابونك
الحاجة اللي بتخاف منها او الزول البيهرشك
-عزومة مراكبية
عزومة مصرييين على قول بابا
يعني على الماشي كدا
وللبقية عودة ان شاء الله

no comment from me here

أنا من بدري شايف الموضوع وما مريت عليهو لأني مسكين ومؤدب
من البيت للمستشفى والعكس صحيح

أنسوا الكلام الفوق ده
بحي رحاب بالمساهمة رقم مية
وأظن بعد مشاركتي دي بتكوي فوتي المية بكتييييييييرصح؟؟؟؟؟

والله بس ينطبق فيك فات الكبار والقدرو
ماشاء الله
بالطريقة دي حتوفتي أي زول
حتى المدير القرب للالف مشاركة
المهم ألف مبروك وإنشاء الله تستمري بالرتم ده
لأنو لما يكون في زول متحرك بيحرك المنتدى كلو
تحياتي

بسيرة إني مسكين ومؤدب يعني مابعرف لغة الشوارع
حأتكلم من منطلق التنظير

لغة الشوارع أو حقيقة هي ما لغة لكن مفردات هي بتعبر عن خصوصية جيل أو مكان أو عمل
أو حتى بيئة أو ثقافة معينة
يعني مثال شكاك أقرب مثال
نكتة بحكي عن واقعنا إستخرجت منها مفردة معينة
وفي مرحلة معينة من عمرك بتصل المفردات دي مرحلة من الخصوصية ما بعرفوها إلا ناس شلتك
لأنها بتكون جاية من مواقف معينة أو من قرايتك أو شغلك
والمفردات دي حاجة طبيعية بتعبر عن الحالة الثقافية البعيشها الجيل أو المنطقة المعينة
لكن بس بتكون ما جميلة لما تكون ألفاظ ما كريمة زي ما قال د.نصرالدين
كترت الكلام صاح؟؟؟؟؟؟؟؟؟

السلام عليكم ورحمة الله تعالى وبركاته ...
شكرا جاكو على مرورك الكريم

والله بس ينطبق فيك فات الكبار والقدرو
ماشاء الله

والكبار دايما كبااااااااااااااااااااااااااااار يا جاكو..

بسيرة إني مسكين ومؤدب يعني مابعرف لغة الشوارع
حأتكلم من منطلق التنظير

دا انت طلعت منظراتي كبييييييير جدا
شكرا ليك وانا بحترم وجه نظرك ..

احم احم,,اسيادها وصلو
اغلب ال قلتيه ده على فكرة ما لغة شوارع,, ممكن تقولي لغة الشباب الروش,, لغة الشرامة,, بس
ا ب د ا ما ممكن تقولي عليه لغة شوارع يا انسة
الموضوع ده عايز ليه كلام كتيييير يوم كده بي مزااااج وراس ظااابط,, ولحدي الوقت داك نشوف اراءكم

و على فكرة لهجتنا السودانية باااائسة جدا,, فأحسن نغير فيها شويه,,

و عدنا تاني

طبعا ما كل الكلمات صحيحة و في كلمات بنقولها بحسن النية

مثلا كلمة حنكني
مرة بحضر لعمرو خالد فقال انها من الشيطان و انه بيحنك البني ادم بمعنى انه بيركب ليه لجام كما في وجه الحمار اعزكم الله
عشان كدة دا واحد من مساوئها اننا بنردد من غير دراية

اخيرا اسيـــــــــــــــــــــــــــادها وصلوا
محمد يس

لغة الشوارع كما يحلو لناس الجيل القديم او كبار السن تسميته
حقيقة انا ما بحب تسميتها بهذا الاسم ..
ممكن نسميها لغة شباب الزمن دا
او لغة الجيل الجديد

انا ذااااااتي معترضة على التسمية دي ....
وفي انتظارك .... يا سيييييييدا

و على فكرة لهجتنا السودانية باااائسة جدا,, فأحسن نغير فيها شويه,,

يا راجل...
انا بعتبر اللهجة السودانية اكتر لهجة مميزة ...
ما بيقدر حد يتقنا الا سوداني او محتك مع السودانيين كتيييير
التشدييد والتشكيل اداها ميزة جمييلة ...
والميزة دي مفقودة في معظم اللهجات الاخرى
يعني مثلا كلمة الابيض (اسم منطقة ) لو ما واحد سوداني حينطقها الابيض (لون )
والكثييير الكثييير من الامثلة ..ا...
وانا بناشد بضرووورة نشرها للعالم ...
باننا نتمسك بيها ونحن برررة بلدنا
ولا شنو؟؟؟؟؟؟؟؟؟؟؟؟؟

طبعا ما كل الكلمات صحيحة و في كلمات بنقولها بحسن النية

مثلا كلمة حنكني
مرة بحضر لعمرو خالد فقال انها من الشيطان و انه بيحنك البني ادم بمعنى انه بيركب ليه لجام كما في وجه الحمار اعزكم الله
عشان كدة دا واحد من مساوئها اننا بنردد من غير دراية

كلامك صح

اول حاجة يا رحاب انتي بتتكلمي وحدة من انشف اللهجات,, كلام حلو ما في,, اتذكري كلام اللبنانيين "تقبرني" مثلا,, تخيلي تقولي لزول كدة
و تاني حاجة لو قعدنا نفكر اي كلمة في الدنيا ح نلقى عندها معنى ما كويس

لانو الناس نايمه,, قررت افتح المواضيع القديمه الحلوة,,
يلا شباب مستني اراءكم