المدير العام ضيفنا على الكرسى الساخن

رامي عبداللطيف كتب:ازيك يا مدير يا حبيبي انت
والله بحن لديك الايام.. ما حنسال زي ما قال الاخ نصر الدين اسئلة عايزة حكة راس
الاستجواب بتاعي
س\ رايك شنو في امدرمان المدينة عطرالاصالة ؟
س\ شقة حي العمدة شرق؟

amr mo7amd $kak كتب:وين يا مدير والله وقعت و وقعت سكاكينك

طبعا اا بحسدك انك من مواليد المدينة بس دا ما حيشفع ليك عندي وو بوعدك بكرسي ساخن جدا جدا جدا

amr mo7amd $kak كتب:نبدا ببشير حيث كل جميل
يا ريت تحكي لينا عن ذكرياتك في هذا الكيان العريق

نصر الدين الزبير دفع الله كتب:ابوحميد يادفعة(دى حنك عشان اخفف عليك وقع الاسئلة )
اجيك من الحتة البتسخن بيها اى زول قعد فى الكرسى دا
كلية الطب جامعة امدرمان الاسلامية
التقديم والقبول:
اول يوم فى الكلية:
اطرف موقف مر بيك فى الكلية:
موقف محرج مربيك فى الكلية(شوف ماتقول لى موقف العربى ولا موقف الفتيحاب داير مواقف حقيقية ):
منتخب الدفعة العاشرة ياترباتونى:

معليش للتأخر في الرد يا شباب , لكن دا تكتيك عشان نكسب زمن !

التقديم : قدمت طبيعي زي اي بني ادم : الخرطوم - الجزيره - الاسلاميه - جوبا - و جميع كليات الطب + صيلتين في النهايه كدا , و كان القدر لي بالمرصاد !
القبول : كنت متأكد اني اما الاسلاميه , او جوبا , و احتمال ضعيف الجزيره ,و كنت ملاوز عديل من الاسلاميه .
اول يوم في الكليه : صراحة انا كنت عارف الوضع كيف , وجيت الكليه كم مره قبل التقديم و القبول , و عارف انو الموضوع - معركه من اجل البقاء حياً الى الساعه 2 , و لكن ما كان في اليد حيله , جيت يوم التسجيل , و قفت اتلفت كدا , وبقيت مارق قبل ما ابدأ اجراءاتي , قابلني محمد عمر حاج التوم في الخور - هو داخل و انا طالع - و بحكم معرفتي به في الثانوي و الابتدائي , و قفنا اديناها 10 ونسه , و اقنعني اني ارجع اكمل اجراءاتي , لانه لابد من مما ليس منه بد !!!
اتخيل يا نصر الدين ما قادر اتذكر اول يوم في الكليه ؟ نحن مبرنا ولا شنو ؟؟؟ لكن بقية تفاصيل ذلك اليوم - يوم التسجيل - بتذكر انو الشباب كانو لافين بيضهبوا و يتراشقو , و محاولات يائسه للبرلمه من السناير ..
اطرف موقف بالكليه : والله يا نصر الدين , اي موقف و لو كان طريف , و لكن كونه في الفتره بين فبراير 2009 الى اكتوبر 2004 فهو بالنسبة لي مأساة ! يعني قول ايليا ابو ماضي : و الذي نفسه بغير جمال , لا يرى في الوجود شيئاً جميلاً , ينطبق تماما على هذه الفتره- وليس علي - .. كان كل همي اني اتخارج من هذه الحفره ( الاسلاميه ) عشان كدا كل المواقف الطريفه كنت براها مآسي و مشاكل ... لكن معرفة شباب الدفعه فرداً فرداً كانت بتخفف علي الواحد .. يعني نصر الدين يونس بالكوره , تاج الدين يفك ليك نكته , ابراهيم الشكري يجدع طعميه , اهو كدا المده عدت ..
موقف محرج : في اي لحظه يقابلك برشم و يتكلم معاك - اثناء محاضره , في الكليه - بتحس انك مُحرَج جدا , انك مضطر تقيف تسمع كلام الزول دا !!

فريق الدفعه العاشره : دا خليهو بي روقه كدا نهاية الكرسي الساخن اقعد ليهو بي مزاج ...

محمد الجاك كتب:السيد المدير شخصيا؟؟؟؟؟؟؟؟؟؟؟؟؟؟؟؟؟؟؟؟؟؟؟؟
الواحد جا في وكت سمح عدييييييييييييل كده
سؤال واحد
لقب ود الناظر؟؟
سؤال إتنين
الهلال البداية؟؟
سؤال تلاتة الكورال؟؟
سؤال أربعة
ههممممممممممممممممممممم
مافي داعي أكمل أسئلتي ساكت
الزمن لسة

رامي عبداللطيف كتب:[b]سلام يا مدير تاني ما تتأخر عشان ما نردم ونكوم الاسئلة واتحملني الليلة بخربها معاك..
س\الحالة العاطفية الان؟
س\ متين العرس؟ (لانو عايز لي سبب اجي السودان)
س\بحكم انو شواكيشك كتيرة كلمنا عن اخر شاكوش واول حب؟

[b]رامي الاعتصامي ..
منور يا راجل يا راقي ..
الحاله العاطفيه : خلينا نقول الحاله الاجتماعيه , و اقول ليك اكملت عقد قراني و لسه ما اكملت الزواج , و ان شاء الله قريب , دعواتك بس !
العرس ( انظر السطر اعلاه ) ان شاء الله ربنا يسهل , و يكون خلال هذا العام ..و مرحب بيك في السودان والله بدون سبب ..
بحكم شواكيشي الكتيره ؟ انت مالك بتاع اشاعات كدا ؟
اخوك كان بيتدردق حريف , عشان الشاكوش لما يقرب ينزل , الزول يزوغ منو , و تجي ضربه سلاخيه كدا ! و اعمل نايم , نحن حنتكلم في السياسه ولا شنو يا قريبك ؟
[/b]

نصر الدين الزبير دفع الله كتب:محمد على البرلوم الخش الكلية ووالده مديرا للجامعة
ماذا كانت تعنى لك هذه الحاجة والصعوبات الكانت بتواجهك بسببها
وليه كنت ناكر انك ودمدير الجامعة اول ماعرفناك

والله يا نصر الدين انا ما كنت ناكر , لكن كنت بتحاشى ذكر هذه النقطه ..
اكيد كنت متأكد انو الناس ح تعرف في يوم من الايام , لكن كنت اخشى ان يتعامل معاي الناس باني - ود الناظر - و كدا ..
بصراحة , كنت مقتنع تماما ان كون والدي المدير , دا لا يعطيني اي حق في التمييز , وكان من اهم حقوقي التي يكفلها لي القانون هي مجانية الدراسه , و اني ادفع فقط رسوم التسجيل , لكن كنت مصر و اصريت على سيد احمد المسجل انو يحدد لي رسوم دراسه , وطبعا في زمنا كانت بسيطه بتتراوح بين 50 150 جنيه لطلاب القبول العام , و سيداحمد حدد لي الحد الادنى , لكن في ...
اذكر موقف طريف و محرج , اول ايامنا في الكليه , جايين انا ومحد سيف كداري قاطعين الخور , قابلنا ياسر التي - حبيبنا يا سر ابو الفتح الدفعه 9 - قابلنا في السكه , و لما بقينا على ارتفاع - 3 امتار من سطح البحر - عمق الخور - بدأ ياسر في كيل الشتائم لحضرة مدير الجامعه - اللي هو السيد الوالد - و انه ودانا ورا الشمس و هو قاعد في مكتبو بره جنب الباب ..
محمد سيف داير يلكز ياسر و يسكتو , انا قلت لي محمد سيف اسكت , بتحرجوا ساي , و كمل كلامو كلو ..
ما كنت بعرف ياسر , لكن في رابعه و خامسه و سادسه توطدت علاقتي بيهو و حتى كان بيعسكر معاي في البيت ..
لما اتخرجنا ذكرتو الكلام دا , قال لي انت والله عوير , مفروض تدقني عديل !!
و كتير كنت بسمع كلام و بعمل نايم , مرات بحاول اناقش بوجهة نظر الوالد , فبيتهموني اني كوز , ومرات بكون الكلام صحيح , و بسكت ..
يعني الوضع ما كان عاضي شديد , و الناس كلها بعد عرفت محمد علي دفعتهم , و اكتشفت بعدها انو محمد علي ود الناظر , اتعاملو معاي عادي , و الموضوع مشى يعني و كدا !